Өмірбаян: Сырым Қашқабаев Әбдіқадырұлы (1979 жылы 4 қаңтар)

Сырым Әбдіқадырұлы Қашқабаев (1979 жылы 4 қаңтарда Алматыда туған) — кино және театр актері, тележүргізуші. ҚР "Дарын" мемлекеттік жастар сыйлығының иегері (2006). Қалибек Қуанышбаев атындағы қазақ мемлекеттік академиялық музыкалық драма театрының актері (1999 жылдан). Қазақстанның еңбек сіңірген қайраткері (2017).
Сырым Әбдіқадырұлы 1979 жылы 4 қаңтарда Алматыда дүниеге келген.
Әкесі - Әбдіқадыр Қашқабаев актер, ҚР Мәдениет қайраткері.
1995 - 1999 жылдары Т.Жүргенов атындағы Қазақ ұлттық өнер академиясының (бұрынғы Алматы мемлекеттік театр және кино институты)ның актерлік факультетін бітірген.
1999 жылдан Қалибек Қуанышбаев атындағы қазақ мемлекеттік академиялық музыкалық драма театрының актерлік құрамында.
Республикалық маңызы бар фистивальдар мен мерекелік жиындардың және телебағдарламалардың жүргізушісі.
Халықаралық «Азия дауысы», Республикалық «Жас қанат» сынды фестивальдерінің тұрақты жүргізушісі.
Сахнадағы негізгі рөлдері
Қалибек Қуанышбаев атындағы қазақ мемлекеттік академиялық музыкалық драма театры сахнасында: Ғ.Мүсірепов « Қыз Жібек» - Бекежан, «Қозы Көрпеш Баян сұлу» - Қозы, М.Әуезов « Қарагөз» - Сырым; «Абай» - Абай, «Айман - Шолпан» - Арыстан, «Еңлік Кебек» - Кебек; Қ.Байсейтов, Қ.Шаңғытбаев «Беу,қыздар-ай» - Серке, Ж.Файзи « Башмағым» - ізкесуші, У.Гаджибеков «Аршын мал алан» - Сүлеймен, Ж.Мольер «Скапеннің айласы» - Карл, Ш.Айтматов « Ғасырдан да ұзақ күн» - мәңгүрт, С.Тұрғынбеков « Мұқағали»- жазушылар одағының хатшысы, Ш.Әлмәшұлы «Бәйтерек басындағы кездесу»- Абылайхан, У.Шекспир «Ромео мен Джульетта»-Ромео, «Гамлет» - Гамлет; А.Сайд «Келіндер көтерілісі» - Нүктебек; Т.Ахтанов «Күшік күйеу» - Кубик; Э.Хушвақтов «Қызыл алма» - Аббас; Дж. Патрик «Қымбатты Памелла» – Брэд; М.Фриш «Дон жуанның думаны» - Дон Жуан; Д.Рамазан «Кенесары - Күнімжан» - Кенесары және т.б көптеген рөлдерді сомдайды.
Марапаттары
Көптеген Республикалық театр фистивальдерінің жүлдегері.
2006 жылы ҚР "ДАРЫН" мемлекеттік жастар сыйлығының лауреаты атанды.
2016 жылы "Қазақстан Республикасының Тәуелсіздігіне 25 жыл" мерекелік медалі.
2017 жылы Мәдениет және өнер саласындағы жетістіктері үшін ҚР Тұңғыш президенті - елбасы қоры сыйлығының лауреаты атанды.
2017 — Қазақстанның еңбек сіңірген қайраткері.