Жұмбақтар жауабымен: Әзіл-оспақты, қалжың, күлкілі

11.11.2016

Қайыңда 50 жаңғақ өсіп тұр. Қатты соққан желден 10 жаңғақ түсіп қалды. Қанша жаңғақ қалды?
Қайын ағашында жаңғақ өспейді

Бір адам құйып тұрған жаңбырдың астында қалыпты. Үйіне келгенде үсті-басы малмандай су, тек шашы су болмапты. Неліктен?
Шашы жоқ

Төрт қызметші,
Бір патша.
Үстел

Адам есектен неге құлайды?
Адам есектен жерге құлайды.

Шайға қант салған кезде, қандай жағдайда қант құрғақ болады?
Құрғақ шайдың (зоварка) үстіне салғанда.

Тауық бір аяғымен тұрса 3 кг, екі аяғымен тұрса қанша кг?
3 кг

Кең аймақты бір өзеннің арғы бетіне өтуі керек болған 117 адамдық әскери топ қиын жағдайда қалады. Сол мезетте қайық сүйреп келе жатқан екі баланы көреді. Бірақ қайықтың кішкентайлығы сонша, ол бір үлкен адамды немесе екі жас баланы ғана көтере алады.
Әскери топтың командирі әскерлерін осы қайықпен өзеннің арғы жағына алып өтеді, соңында балаларды қайықтарымен жағада қалдырады. Бұл үшін қайықпенен арғы жағаға неше рет барып келуі керек?
354 рет

9 қабатты ғимараттың 9-шы қабатында бір бала тұрады екен. Бұл балаға досы қонаққа келе жатып, лифтке мініп 6-қабатты басып, 6-шы қабаттан түсіпті, қалған 3 қабатқа баспалдақпен жаяу көтеріліпті, не үшін?
Бойы қысқа болғаны үшін. (одан жоғарыны басуға қолы жетпегені үшін)

Біздікі болғанымен басқалар қолданатын нәрсе?
Есіміміз

Ұзарған сайын қысқаратын нәрсе не?
Өмір

Бір кісі найзағай жарқылдаған сайын шашын тарайды екен, неге?
Фотоға түсіп жатырмын деп ойлайды екен

Қай айда 28 күн бар?
Барлық айда

Мені ешкім түсінбейді, неге?
Өйткені ол ешкі ғой

Патша өте дәмді және мінсіз етіп сорпа пісіртеді. Бірақ патша бұл сорпада бір кемшілік бар дейді. Зындандағы тұтқынға бір кесе сорпа құйдырып бір ұрттатады да «Егер осы сорпаның несі кем екенін тапсаң сені бостамын» дейді. Тұтқын патшаға сорпаның несі кем екенін айтып бостандыққа шығады. Сұрақ: сорпаның несі кем еді?
Тұтқын сорпаны ұрттағанда бір ұрттамы кеміген еді. Соны айтып бостандыққа шығады

Бірінші төрт аяқты, кейін екі аяқты, одан кейін үш аяқты ол не?
Адам

Лимонның жартысы не болады?
Лимбес

Король кімнің алдында тәжін шешеді?
Шаштараздың

Ұрғашы кенгуру қандай жағдайда қатты ашуланады?
Қалтасындағы баласы бұтына жіберіп қойған кезде

Суды елекпен қалай тасуға болады?
мұз қылып қатырып

Аяқкіим жөндеушілердің ең жақсы көретін клиенті?
Қырықаяқ

Қай жерде жексенбі сенбіден бұрын келеді?
Сөздікте

Итпен биттің айырмашылығы неде?
Иттің үстінде бит болады, бірақ биттің үстінде ит болмайды.

Құлақ не үшін керек?
Көзілдірікті ұстап тұру үшін

Қатты жылдамдықпен келе жатқан жүк машинаны бір қолымен кім тоқтата алады?
Жол полициясы

Еліміздегі ең ұзын ағаш қайда өседі?
Ұзынағашта

Бір үйде елу батыр, үй сыртына сүйкенсе өліп жатыр?
Сіріңке

Бір бөлмеде 9 свеча жанып тұр, үшеуін сөндірсек қаншауы қалады?
Үшеуі қалады, қалғандары жанып, таусылып жоқ болады

Ақтөбеде біреу Өскеменде жоқ, Алматыда екеу Астанада көп? Ол не?
“а” әрібі

Машинаның жылдамдығы қай кезде ұшақтікіне жетеді?
Ұшаққа салынған кезінде

Үйдің ең суық жері?
Сырты

Электровоздың түтіні батысқа қарай созылып жатса, өзі қай бағытқа қарай жүріп жатыр?
Электровоздың түтіні болмайды

Бір патша уәзіріне зынданнан бір тұтқынды алғызыпты. Тұтқынға өлім жазасын таңдау құқығын өзіне береді, бір тауық беріп, “осы тауықты қалай өлтірсең, сені де солай өлтіреміз” депті. Тұтқын тауықты өлтіргеннен кейін патша оны босатыпты? Патша тұтқынды неліктен босатқан?
Тұтқын тауықтың басын аузына салып, тістеп жұлып алады. Ал тұтқынның басы патшаның аузына симайтын болғандықтан патша тұтқынды босатып жібереді.

Машинаның қай дөңгелегі айналмайды?
Запастағы дөңгелек

Үш үйрек қатар тізіп ұшып келеді екен. Бірінші үйрек “Менің артымда екі үйрек бар” депті. Екінші үйрек “менің артымда бір үйрек бар” депті. Үшінші үйрек “Менің артымда үш үйрек бар” депті. Бұл қалай болғаны?
Үшінші үйрек өтірік айтқан

Әлемдегі ең үлкен алма қайда өседі?
Алма ағашында

Бір пілдің үстінде 100 құмырсқа бар екен. Піл сілкініп қалғанда құмырсқалардың біреуі ғана қалып қалғандары жерге құлап түсіпті. Төмендегі құмырсқалар пілдің үстіндегі құмырсқаға қарап не деп айтқан?
Ез оны

Елімізде талдармен жасалған қорған қай қалада?
Талдықорғанда

Тарихта ең үлкен қалпақ киген кім?
Басы ең үлкен адам

Қай сұраққа болымды жауап берілмейді?
Ұйықтап жатсың ба?

Есікті ашу үшін не қажет?
Есіктің жабық болуы қажет

Теңіздің ортасында не бар?
“ң” әріпі

Жүзе алмайтын адам суға түссе қалай шығады?
Үсті су болып шығады

Бір кісі төсегінің айналасында жүгіріп жүр екен, себебі не?
Ұйқысы қашып кетіпті, соны қуалап жүр екен

Адам нені бұзғанда қуанады?
Рекорд

39 рет “тақ”, 1 рет “тик” деп дыбыс шығаратын не?
Бір аяғы ақсақ қырықаяқ

Балықтар неліктен сөйлемейді?
Су жұтып қоймау үшін

Ненің көлеңкесі жоқ?
Көлеңкенің

Қазақстан мен Өзбекстанның ортасында не бар?
мен