Жұмбақтар жауабымен: Музыкалық аспаптар (домбыра, қобыз, жетіген, сырнай, скрипка)

23.10.2019

Салдырдым екі жорға жалтыр мұзға,
Он жігіт қызмет қылып жалғыз қызға.
Күніне жалғыз бекет жерді аралап,
Он жігіт тынығады әрең сонда.
Домбыра

Қояды әркім оны бұрап-бұрап.
Бар екен маңдайында жалғыз көзі,
Болады тоқсан түрлі айтқан сөзі.
Домбыра

Басы бар денесі жоқ, бойы бір кез,
Табарсың болсаң зерек осыны тез.
Қозғалсаң қос құлағын тігіп алып,
Тамаша әр тараптан айтады сөз.
Домбыра

Құлақтан кіріп, бойды алар,
Көңілге түрлі ой салар.
Ән-күй

Сексен сегіз тілі бар,
Сан құбылған үні бар.
Фортепиано

Ұзын мойын, екі ішек,
Қатар-қатар тепкішек.
Басып көрсең бір-бірлеп,
Үн шығады күмбірлеп.
Домбыра

Бас, құлақ, мойны бар,
Үп-үлкен шанағы бар.
Әндетіп шығар әні бар,
Бұл аспап, қай аспап?
Қобыз

Жеті ішектен жеті түрлі үн шығар,
Әуезінен жеті тарау мұң шығар.
Ойнап кетсең түрлі-түрлі жыр шығар,
Бұл аспап,қай аспап?
Жетіген

Саусақ батпас түтіктен,
Сандуғаш құс сайрайды.
Сыбызғы

Иiр-иiр құбыр,
Үрлесең бұлбұл.
Керней

Бес жолмен жүреді,
Бар әуенді біледі.
Нота

Құлып аузын ашатын да,
Жабатын да құралмын.
Бірақ қазір бұл жерде мен
Музыка әлемін ашамын.
Скрипка кілті

Таяқшамен жіңішке сермеп қалса,
Сахна толған оркестр әнге басар.
Сиқыршы да емес ол, емес жонглер,
Ендеше кім, білсең айт,
Ол...
Дирижер

Боз арғымақ, аузы жоқ,
Мұрны жоқ - екі құлақ,
Белінде белбеуі бар бунақ-бунақ.
"Шу" деп, саусақпенен шертіп қалсаң,
Шабады жүйрік әуен тулап-тулап.
Домбыра

Әргез-әргез,
Мойыны біргез.
Шақырса келмес,
Қолдан түспес.
Домбыра

Мойнында тоғыз торы бар,
Аңыраған екі жолы бар.
Күнде тоқпақ маңдайында,
Арылмаған соры бар.
Домбыра

Қолымда бір қамшым бар екі өрмелі,
Істеген әшекейлеп әртүрлері.
Бойында сол қамшымның қасиеті көп,
Қолына алған кісі бір сүйенеді.
Домбыра, шек, пернелер

Екі жерде жалы бар,
Күні-түні жолығар.
Күні-түні тоқпақтар,
Маңдайының соры бар.
Домбыра, он саусақ

Базардан алып келген сары сандық,
Он жігіт зорға барып кілтін салдық.
Он жігіт кілтін салып қозғап көрсек,
Сөйлейді әлгі сандық дамбыр қағып.
Домбыра

Мойнына қатар-қатар түйме салдық,
Сегіз қыз,сегіз қызға қосылдырып,
Құбылтып неше түрлі күйге салдық.
Домбыра

Тартылған екі арқаны ұзын бойға,
Сөйлеуге сондай шебер тапсаң айла.
Әр жерде аршындалған балдағы бар,
Ойнайды он бармағың білсе айла.
Домбыра

Бір тұйғын, екі лашын, бір сандуғаш,
Жиылып жеті қонақ болыпты мәз.
Басында екі кептер қонып отыр,
Бәрінің ұялауы жалғыз ағаш.
Домбыра

Мінгенім дайым менің бір арғымақ,
Бітіпті төбесіне екі құлақ.
Тартатын сегіз жерден бедері бар,
Кетеді қол тигенде қатты зырлап.
Домбыра

Қарны қабақтай,
Бұты таяқтай.
Тиіп кетсең жылайды
Жыласа да ұнайды.
Домбыра

Бұлбұлдың сегіз аяқ, бір басы бар,
Тең басқан сегіз жерден таңбасы бар.
Үстіне мініп алып жорғалатсаң,
Салатын әрбір түрлі жорғасы бар.
Домбыра

Бір нәрсе қараңғыда қаймалайды,
Азнаса көмейінде мал жылайды.
Құйрығын қара жерге тіреп алып,
Келеді баяғының әнін салып.
Қобыз

Қаламы жоқ, ал бірақ,
Есептегенін сөзбе-сөз,
Сол қалпында қабылдап,
Жазып алар тезбе-тез.
Қайталайды тақылдап,
Тыңдай қойсаң көзбе-көз.
Магнитофон

Жүректі баурар үні бай,
Баршаға ортақ тілі бай.
Саз

Тілі бар түймелі,
Кеңірдегі кернеген,
Ән менен күй кені.
Сырнай

Бір құлаштай сабы бар,
Бунақтары тағы бар.
Басы ұқсас қайыққа,
Жолықтырар ойыққа,
Қос танабы тартылған,
Ұзына бойы он тұнған.
Домбыра

Кепкен жарғақ,
Шеңберге керілген,
Соқсаң сарнап,
Үн шығады төгілген.
Барабан

Доп

Мақала ұнаса, бөлісіңіз: