Өлең: Сүйіп көрмеген адамның сөзі

Махаббат шыңы өмірдің өзі,
Көретін жалғыз көңілдің көзі.
Сезімді жалған, тұрақсыз дейтін
Сүйіп көрмеген адамның сөзі.

Ғашықтық мүлдем өзгеше әлем,
Жаныңа сая, таусылмас бар ем.
Ұнатам деген сөздерің жылы
Жүректен шықса айтылар әрең.

Менің де бүгін ғаламат жайым,
Өзімдей өзге маған-ақ дайын.
Шынайылықты жеткізу қиын
Пәктіктің ісін адал ақтайын.

Кіршіксіз көңіл ақ қардай таза,
Қара дақ таңба, берілген жаза.
Ақ түстей болсаң тыныш әлемің
Дақ түссе жанға бермейді маза.

Махаббат шыңы өмірдің өзі,
Көретін жалғыз көңілдің көзі.
Сезімді жалған, тұрақсыз дейтін
Сүйіп көрмеген адамның сөзі.