Қазақша өлең: Ерлан Жүніс (Ұзатылмаған қыз)

Ұзатпады оны. Ұзамады үйден.
Үйі де әрі қашықтау.
...Бір жігіт болды-ау, сірә да сүйген,
Сол жігіт болды-ау жасықтау...

Қарай да қарай айна да ескірді,
Жек көрді, мүмкін, айнаны,
Айлы түндерде ол ойлады ешкімді,
Ешкім де оны ойлады...

Жылай да жылай жастық сарғайды,
Жастық та дұшпан - әр тайса.
...Жігіт пен қызда достық болмайды,
Болады, бәлкім, қартайса...

Тарай да тарай тарақ кетілді,
Кетілген шығар төзімі,
...Ұзақ сақталған шарап секілді,
Ұзатылмаған қыздың сезімі.