Қазақша өлең: Ғабиден Қожахмет (Қырық деп соқты ағаның асыл жүрегі)

Ұл менен қызы құдірет, күшке балаған
Адамның бәрі туады асыл анадан.
Анаңыз бір кез сізге де тірлік сыйлатып,
Қырыққа кепсіз, мінеки, сіз де, ағажан.

Оятты осы ой думанды топтың ынтасын,
Қырық деп, аға, ортаңыз әнді шырқасын.
Отыздан соң да қырықта қамал алсам деп,
Осынау жастың шолып та тұрсыз қырқасын.

Алғансыз, аға, жақсысын талай жүлденің,
Өмірдің өзі біресе шатттық, бірде мұң.
Еске алып енді отырсыз ба оймен парақтап,
Отыздың отты, жиырманың жалын күндерін.

Сіз жақта бүгін, ағажан, үлкен кенен той,
Тойменен бірге кеудеде тағы еленді ой.
Отызды отты, жиырманы жалын десек те,
Халқыңыз оймен қырықты қылыш деген ғой.

Өткен шақ, аға, думанға толы елес пе,
Халқыңыз солай қырықты қылыш демес пе.
Елуге бір күн ұмсынып сіз де енерсіз,
Елудің өзі ердің де жасы емес пе.

Қырыққа кепсіз, айтыңыз бізге ұлағат,
Толмаса көңіл, мінезді осал сынап ап.
Кешегі күннің үлгісін күй ғып шертерсіз,
Жастықтың көші қалмасын дерсіз тұралап.

Жүйрікке бүгін сіз мінген, аға, мінгенбіз,
Жастыққа тән бір қызумен өмір сүргенбіз.
Шаңыраққа барсақ, ағаның үйі ақ жайлау,
Сізде де жайнап келеді өсіп ұл мен қыз.

Жаз жанын көріп, шаттандық үйде жеңгенің,
Ұмытар кім бар пейілмен асын бергенін.
Сенеміз, аға, айтқансыз бізге жеңгені
Қыздардың бір кез аруы еді деп те ең керім.

Аман бол, аға, жүз жас деп өмір сүріңіз,
Жайқалып тұр ғой ұл-қыз боп артта бүгін із.
Асқар тау болып іні мен қарындастарға
Өмірде мынау ақылшы болып жүріңіз.

Жайдары жаннан жаз көңіл бүгін көргесін,
Бәрі де солай құрмет тұтар жеңгесін.
Жеңгеймен бірге думанға талай куә боп,
Атыңыз қосқан бәйгенің алдын бермесін!

Шаттыққа толы болсыншы әр кез жүзіңіз,
Сіз барда, аға, демейміз көптің біріміз.
Құлын-тайдай боп соңыңызға ерген ізіңіз -
Аман-сау жүрсін ұлыңыз бенен қызыңыз!

Осынау тойды ағайын, жұрттар біледі,
Қырық деп соқты ағаның асыл жүрегі.
Осы еді сізге қарлығаш қарындастар мен
Арналған бүгін ізетті інілер тілегі.