Қазақша өлең: Ақберен Елгезек (Нұрлы жүрек құлпырып, құбылып тұр)

Сағыну мен аңсаудан, сенесін бе,
Мәжнүн жанның айналдым елесіне.
Нұрлы жүрек құлпырып, құбылып тұр,
Періштенің ілінген жебесіне.

Қорлансам да армандар мазағынан,
Бас тартпадым сезімдер азабынан.
Шөліркеген жүрегім махаббатқа,
Сіміргісі келіп тұр таза мұңнан!

Болмысына айналып көлеңкенің,
Сыбырынан гүлдердің көрем сені.
Мен сен үшін сүйемін адамзатты,
Біліп қойып қуанды әлем соны!..