Қазақша өлең: Ақберен Елгезек (Сенім)

Алғашқы құстар пейіштен келген,
Мен осыған сенемін, жаным.
Құстардың қанаты періштелерден,
Мен осыған сенемін, жаным.

Алғашқы гүлдер жұлдыздан туған,
Мен осыған сенемін, күнім.
Алғашқы түндер жалғыздан туған,
Мен осыған сенемін, күнім.

Алғашқы сәуле Тәңірден болған,
Мен мұны білемін, айым.
Алғашқы өлім өмірден болған,
Мен оған күлемін, айым.

Алғашқы өлең сезімнен келген,
Мен оны жазғанмын бұрын.
Алғашқы сәттен көзіммен көрген,
Өзіңді сүйемін, гүлім!