Өлең: Жұмағали Саин (Балалық)

Базарда, базар бір базар
Қызықсың - ау, балалық!
Бедерін. гауһар, сап алтын
Жүзіксің - ау, балалық!
Аспанға күндей жарқылдап
Шығыпсың - ау, балалық!
Өмірде күміс шабықтай
Жүзіпсің - ау, балалық!
— Ей, балалық, балалық,
Тоғайдан келші тал алып.
Томпаңдап мен де ойнайын
Торала құнан саналып.
Қашағанды құр-құрлап
Ортамызға қамалық.
Қатарласа жарысып
Қиқу салып шабалық.
Күміс те емес, күн де емес,
Теңдесі жоқ балалық,
Сағынбайтын әлемде
Пендесі жоқ, балалық.
Балалық - ау, балалық,
Кел, бір ойнап таралық!
Мадақтайық бір сені
Шекеңе шоқ қадалық,
«Бірім – бірім - бірім» деп
Саусақты да саналық,
Көзді тас қып жұмалық,
«Кім түрткенін» табалық.
Кел, жарыса шабалық,
Біздің үйге баралық.
— Ей, балалық, балалық!
Есте болсын даналық,
Кім ұмытқан сабағын
Кәне кітап қаралық!
Білім шамын жағалық
Оқып өнер табалық!