Өлең: Ахау жалған (Қазақ ауыз әдебиеті)

Айт дегенде өлеңді тіл айтады,
Қандай адам тіліме мін айтады-ай.
Өлең айт деп балалар қолқа салса,
Мен айтпасам, өлеңді кім айтады-ай?

Ахау, жалған,
Өтіп заман барады
Бұл адамнан-ай.

Не деп өлең айтайын, қарақтарым,
Құтты болсын, мінеки, талаптарың-ай.
Кейінгіге үлгі боп қала берсін,
Осылайша айтайын қалап бәрін-ай.

Ахау, жалған,
Өтіп заман барады
Бұл адамнан-ай.