Қазақша өлең: Ілияс Жансүгіров (Ел шетінде, жау бетінде)

Бұлт қалың, ай қараңғы,
Куілдеп соғып тұр дауыл...
Төңірек, маңай, ғаламды
Жамылшы жапты бір ауыр...
Қалың тоғай, қара орман,
Су салдыры недәуір,
Жаңа жұрт, жапан, жар қонған
Жадағай қора, жарлы ауыл...
Қорада қойлар қорқулы,
Мөңіреп сиыр, көк теке
Бақылдайды, у-шулы...
Алдымда от алакөлеңке.
Төңіректеген төбетім,
Тығылып үйде ықтайды.
Күзетер деген күзетшім
Бүркеніп быр-быр ұйықтайды.