Өлең: Мұхтар Шаханов (Қарағайға қарсы біткен бұтақ)

Қара күші той тойласып, жең ұшынан жалғасқан
Дәуір үнсіз томсарады, ар-намысын қар басқан,
Зиялысы жағымпаз боп, ділін сатып алжасқан.
Сондай шақта тек шындығын ете білген алдаспан,
Қарағайға қарсы біткен бұтақ ең сен, нарқасқам.
Қоғамды алға сүйрейтін де нарқасқалар, қасқалар,
Қасқа жүрер жолдарға ылғи орлар қазып тасталар.
Олар көзі тірісінде достан бұрын қас табар.
Ұлттың маубас сорлылығы, жеңілісі, ездігі
Өзі туған қасқаларға тор құрудан басталар.
Дүниенің бар сабынын жұмсаса да ағармай
Қалатындар жүруші еді саған тұсау таба алмай,
Ел тізесі бүгілмейді, рухы, тілі жоғалмай.
Ұлттық рух моторына болып едің жанармай,
Енді ұлтыңның төріндесің, қайсар Марат Қабанбай!