Қазақша өлең: Қалқаман Сарин (Талғат - Гүлназ)

Талғатым – таудай, Гүлназым – балдай,
Жарасып тұрған бір нәзік жандай.
Ақсүйек өнер ақындықпенен
Досыңа арнап жыр жазу қандай.

Бір өзің, досым, арланы Алтайдың,
Мінезің – тауы Тарбағатайдың.
Мұзтаудың тағы мұзбалағысың,
Мен сені соған тән деп атаймын.

Бірегей досым бұл өмірдегі,
Тәтті сөз сенсің тілегімдегі.
Астана жақтан асықтырғандай,
Досым деп соққан жүрегім мені.

Ән салып берші, палуан жігіт,
Кетсінші таудың бәрі жаңғырып.
Бойыңа берген алпыс өнерді
Алланың өзі алуан қылып.

Жып-жылы екен жарыңның жүзі
Жаныңның сол ғой жарық жұлдызы
Ұлықты ұл мен қылықты қыздың,
Анасы болсын Әлімнің қызы.