Қазақша өлең: Қалқаман Сарин (Аянатқа)

Қызым менің, қызығым, Аянашым!
Анаң сенің жүзіңді аяласын.
Таң нұрымен таранып еркем ертең,
Күн нұрымен бойжетіп боянасың.

Қызым келді өмірге, көз қуаныш
Қуаныштан қиялды кездім алыс.
Мәпелеген ботам-ау, бір мен үшін,
«Әке» деген ардақты сөз жұбаныш.

Бірегейі сен едің көп үміттің,
Ниет қылып Алладан сені күттім.
Менен асқан бақытты жан бар ма екен
Құшағымда тұрғандай көрініп Күн.

Жұдырықтай жүректің бөлшегісің,
Анаң барда асқақсың, еңселісің.
Өмірімнің жалғасы – ерке құсым,
Өлең жазам өлмейтін мен сен үшін!