Қазақша өлең: Әбіш Кекілбайұлы (Аласарып кетердей көп қой қауып)

Аласарып кетердей көп қой қауып,
Алатауға қарайын ауық-ауық.
Алатауға қарасам ауық-ауық
Кетеді екен оны да мұнар жауып.
Мұнар жауса асқар шың ауық-ауық
Жоғалады кеткендей дүние ауып.
Көзден ұшқан асқар шың ауық-ауық
Жарқырайды қайтадан жаңбыр жауып.
Ақ қар жапқан Алатау ауық-ауық
Жоғалады жым-жылас тұман жауып.
Тұман жапқан Алатау ауық-ауық
Қайта ашылар басына ақ қар жауып.
Тау орынында құбылған мұнар екен,
Мұнар өтер, шың мәңгі тұрар екен.
Көңіл ит те құбылған тұман екен,
Көп нәрсені бүлдірер күмән екен.
Күмәнге ертсе күйкі мұң ауық-ауық,
Кете бергің келеді дүние ауып,
Алжастырар дүниеде көп қой қауып
Аласартып кететін ауық-ауық.
Аласартып кетердей болса қауып,
Алатауға қарап қой ауық-ауық.